PARSAME

RAKSA lapatanna : pangalaho, guna, manang tujuan na dapot paboaon taringot tu sada barang. Jadi molo RAKSA NI ANGKA ULOS , marlapatan ma i tujuan manang guna ni angka massam ni ulos.

1. ULOS MANGIRING.

Di adat batak, Ulos on jot-jot do dilehon halak songon parompa, na marsinta-sintahon asa martinodohon anak dohot boru dope dak-daknak na pinarompana i, asa lam torop iring-iring-on ni natorasna.

Jot-jot do tu anak dohot boru na baru marbagas ni uloshon “ulos mangiring” on, na marsintahon asa tibu ro hagabeon tu nasida, laos ni dok ma umpasa :

Giring-giring gosta-gosta.

Sai tibu ma hamu mangiring-iring huhut mangompa-ompa

PAMANGKENA : Pinartali-tali manang sinampesampehon.

2. ULOS MANGIRING PINARSUNGSANG.

Ia ulos on pangkeon ma on mangulosi molo songon na adong na masisuharan(marsungsang) di partuturan. umpamana na pinarhula-hula hian gabe pinarboru. Jadi ulos on ma pakeon mangulosi penganten manang mambahen parompa ni dak-daknak. Jala di tingki na mangkatahon ulos i pangulosi ingkon solothononna ma mandok umpama

Rundut biru ni eme, mambahen tu porngisna

Marsijaitan andor ni gadong mambahen tu ramosna

PAMANGKENA : Pinartali-tali manang sinampesampehon

3. ULOS BINTANG MAROTUR (MARATUR)

Didok ompunta sijolo-jolo tubu ninna barita i, On ma ulos Siboru Habonaran, Si Boru Deak Parujar, mula ni panggantion dohot parsorhaon, pargantang pamonori na so boi lobi na so boi hurang. Ia ulosna i ima na margoar

Bintang na maratur (marotur)

Siatur maranak, siatur marboru

Siatur hagabeon, siatur hamoraon

Tu na olo mangido sian Amanta Debata.

Jadi molo binahen ulos on mangulosi penganten. solothonot-hon ma tamba ni angka hata pasupasu jala dohonon, Ulos bintang marotur do on, asa sai anggiat ma diatur jala dilehon Amanta Debata Parasi Roha i dihamu hagabeon dohot pansamotan, asa ro nian angka i ditingki na lehet, di ombas na denggan jala mambahen tua di hamu.

Molo gabe parompa do ulos on ulos-honot-hon, tambahonon ma tu angka hata dohot pasupasu sidohonon hian angka pandohan on, “Ia ulos on bintang marotur do, asa sai anggiat ma diparbisuhi Amanta Debata Parasi Roha i hamu manogunogu jala mangatur dak-daknak on dohot angka tinodohonna na naeng gabe jolma na malo mangaur angka tinodohonna, tu hadengganon dohot harentaon.

PAMANGKENA : Pinartali-tali manang sinampesampehon

Horas

Parjabu sukubatak.com

Diambil dari buku : TM Sihombing (O. ni Marhulalan)

Berlanjut ke halaman 84

Tags: adat, batak, horas, parompa, suku, ulos, umpama umpasa