PARSAME

RAKSA lapatanna : pangalaho, guna, manang tujuan na dapot paboaon taringot tu sada barang. Jadi molo RAKSA NI ANGKA ULOS, marlapatan ma i tujuan manang guna ni angka massam ni ulos.

4. ULOS GODANG.

Di adat batak, Ulos on jot-jot do digoari “Sadum - Angkola”, Uli situtu do rupana. Argana pe antong, umumna, tumimbo do sian arga ni ragidup nang pe nian derajatna di toru ni ragidup

Ia “ulos - godang” on niuloshon do i tu ianakhon si godang ni roha niba, ima ianakkon na mabahen las ni roha na balga, na godang di iba. Ia sintasinta niulos -godang on, on do :

Asa songon goar ni ulos i ulos godang, sai boi nian tu joloan on na ni ulosan i patupahon godang na uli jala na denggan tu sisolhotna dohot donganna, jala marhite na uli jala na denggan tu sisolhotna dohot donganna, jala marhite i gabe dapotan godang pasupasu dohot asi ni roha ibana sian Amanta Pardenggan basa

PAMANGKENA : Boi do sampe-sampe-hononton, boi nang abithononthon manang hohop-honon-hon.

5. ULOS RAGIHOTANG.

Di Adat batak, ulos on ma na gumodang di ulohon halak di tingki on. Tongam do antong “ulos ragihotang” i ulos-hononton, tarlobi molo ragihotang na ummuli i ni uloshon, i ma na ginoaran “potir si na gok”

Adong do angka umpasa na mardomu tu ulos i na denggan dohonon di tingki na mangalushon i, Pinillit ma manang dia sian angka umpasa i na toho dohonon tu na ni ulosan i. Angk on ma :

Hotang do ragian, hadang-hadangan pansalongan
Sihahaan gabe sianggian, molo hurang sinaloan

Hotang binebe-bebe, hotang pinulos-pulos
Unang iba mandele, ai godang do tudos-tudos

Tumbur ni pangkat tu tumbur ni hotang
Tusi hamu mangalangka, sai disi ma hamu dapotan

Hotang hotari, hotang pulogos
Gogo ma hamu mansari asa dao pogos

Hotang do bahen hirang, laho mandurung pora-pora
Sai dao ma sian hamu na sirang, lai lam balga ma holong ni roha

Hotang dipara-para, ijuk di parlabian
Sai dao ma nasa mara, jala sai ro ma parsaulian.

PAMANGKENA : Boi do sampe-sampe-hononton, boi nang abithononthon manang hohop-honon-hon

6. ULOS SITOLU(N) TUHO

Di adat batak ninna, adok do na istimewa di ulos on ima , tangkas do tarida di gorgana i adong tolu tuhona. Ndang tarjua so ingkon simbol ni Dalihan Na tolu ulos-on. Jadi molo pinangke ulos on mangulosi penganten manang gabe parompa porlu ma dohonon poda taringot tu Dalihan na tolu, ima. Manat mardongan tubu, Elek Marbor, Somba Marhula-hula.

Jala di ujungna laos dihatahon pangulosi i ma pasu-pasu ‘Sitolu saihot’, ima .

1. Umpasa Pasu-pasu as sai masihaholongan jala rap saur matua.

Sidangka ni arirang na so tupa sirang.
Diginjang ia arirang, di toru ia panggonggonan

2. Umpasa Pasu-pasu Hagabean

Bintang na rumiris tu ombun na sumorop
Toho di rondang ni bulan
Anak pe di hamu sai riris, boru pe antong torop
Jala sude sioloi Tuhan

3. Umpasa Pasu-pasu pansamotan.

Bona ni aek puli, di dolok Sitapongan
Sai ro ma tu hamu angka na ulis, songon i nang pansamotan

PAMANGKENA : Boi do sampe-sampe-hononton, boi nang abithononthon manang hohop-honon-hon

Horas