PARSAME

RAKSA lapatanna : pangalaho, guna, manang tujuan na dapot paboaon taringot tu sada barang. Jadi molo RAKSA NI ANGKA ULOS, marlapatan ma i tujuan manang guna ni angka massam ni ulos.

7. ULOS BOLEAN.

Di adat batak, Na jolo ra sai ulos on do solmalna diuloshon halak tu ianak hon na marsitataonon laho mangapuli na ni ulosan i.

Ra adong do pardomuan ni goar “bolean” tu hata indonesia “membelai-belai”, na marlapatan mangapuli dohot “belaian” na marlapatan “apul-apul”

PAMANGKENA : Sinampe-sampehon.

8. ULOS SIBOLANG.

Di Adat batak, Ia ulos sibolang on ra ulos “sibulang” hian do goarna, ai guna-na na parjolo, ninna, ulos i ma silehonon tu jolma sibulangbulangan, lapatanna, jolma sihomatan siala jasana. Umpama-na ulubalang na manaluhon musu manang halak na barani huhut sanggup pamaatehon angka binatang panoro.

Di tingki on ulos on do jotjot dibahen halak mangulosi amang ni helana jala digoari mai ulos pansamot na sumintahon asa jolma na boi pangunsandean nian amang ni hela i, na gogo mansamot jala parpomparan sibulang bulangan, jala dohono ni pangulosi i masongon tamba-tamba ni angka hata pasupasu na somal umpasa on

Marasar sihosari di tombak ni Panggulangan,

Sai halak na gogo ma hamu mansari jala parpomparan si bulangbulangan.

Ulos sibolang on do huhut jotjot diparulos halak laho mangadopi dohot mambahen adat tu na monding, bahen tujung ni namabalu pe jotjot do ulos sibolang on dipangke

PAMANGKENA : Boi do sampe-sampe-hononton, boi nang abithononthon manang hohop-honon-hon

9. ULOS SURI SURI TOGU-TOGU (LOBULOBU)

Di adat batak, adong do na istimewa di ulos on ima, ndang digotap rambuna, torus do i laos mardomu. Jadi gabe songon abit kain sarung do ulos i naingkon suruhon laho mamangke. Ia tujuanna disi on do, parjolo. asa une pakeon songon kain sarung molo jumpa parabiton. Paduahon. asa unang mura madabu dakdanak sian ompaan niba molo pinake ulos i gabe parompa

Digoari do ulos on ulos lobulobu (lobu=masuk), asa anggiat lobu(masuk) angka na uli tu jabu ni na mamangkesa.

Molo dipangke anak boru ulos on mangompa ibotona, diendehon ma

Ulos lobu-lobu, marrambu ho ditonga-tonga

Tibu ma ho ito dolidoli, jala mambahen silas ni roha

Ia molo anggina do na niompa ni anak boru i diendehon ma

Ulos lobu-lobu marrambu ho ditonga-tonga

Sinok ma modom ho anggi, suman tu boru ni na mora

PAMANGKENA : mambahen parompa manang pinarabit

Horas